The Beheading of John the Baptist by Mog Ruith
Author: unknown
Editor: Annie M. Scarre
An electronic edition
view the header | view the translation | view the Book of Ui Maine on ISOS
p. 174.
(MS fol. 123b)1. Clanna Israel uli
scailseat fon mbith mbharrbuidi,
ni hobair, urusu sin,
a n-airem na ’n-indisin.
2. Pearsa is Media ’malle,
na Greig is na Gallachde:
cethri cinid robi thoir
o ngabtha rigi in domain.
3. Righ rogab in doman thair
dar comainm Iruath anbaig
romarbadh leis, garb in scel,
Eoin ger easpac in firean.
4. Fatha marbtha Eoin ain
do muintir hIruaith anbail,
rob uathmar in gnim garb grind,
ma mnai Philip Labarcind.
5. Pilip Labarceand gan lean
ba firbreitheam breath firean,
he roberad breath go mbuaidh
do thshluagh in domain dreachruaidh.
6. Robu marb Philip iar sin
a [n]dun Arguais ingantaidh;
is robi a bean tall ’na tigh
gan ceile ’na comhleabaigh.
7. Eriodes ainm na mna,
bean Philip gan imarga;
anmand a ingean gan geis
Saliuus agus Neiptis.
8. Do[g]nidh Neiptis, ceol fa bloidh,
cúiseach bind asa bealaibh;
is do[g]nidh Salius tra
cleasaideacht is lemenna.
9. Rob ingnadh le cach a ceird
do tshluagaibh in domain deirg,
triasa fa[g]badais crodh cain
o deagdainibh in domain.
10. Teit Eriodeis iar sin
amach isan aidchi-sin
go crich in fir oig
go riacht isin nEsculoip.
11. Philip brathir Iruaith ain
assinn Easculoip imshlain
dorad side seirc truim de,
do mnai Philip araile.
p. 176.
12. Da fiarfaigh Pilip iar sin
d’Eriodeis in n-aidchi-sin,
in faichfedh leis tall ’na thigh
ar caibthi nas ar comaigh.
13. Adubairt in ballgeal ban
re Pilip n-uallach n-imslan
go faic[h]fedh si leis go lúath
acht gu m[b]o maith le hIruath.
14. Dacuadar rompu mar aen
go teach hIruaith ar gach raen
go ranaisg hIruath iar sin
a caibthi agus a comaidh.
15. Deisidhis Pilip iar sin
a catraigh in righ rogil:
robo geis don righ go n-aeibh
neach do thsuidhi ’na c[h]ath[a]ir.
16. Da fiarfaigh hIruath iar sin
do Philip, da derbrathir:
‘craed ’mar mill[is]-siu mo reacht?’
‘duit-siu, a Philip, rob eg[c]ert’.
17. Rogab hIruath condshlat coir
ina laim rigda romoir,
is robuail Pilip is tigh
a cinaigh a andligidh.
18. Idubairt Eriodeis ar sein
re Pilip andsan uair-sin,
nach faichfedh leis, gi modh airc,
arna bualadh don connshlait.
19. Andsein theit Pilip amach
go dereach is go dubach,
arna egnach don mnai thoir,
arna bualadh da brathir.
20. Dacuaidh Pilip a teach Eóin
inn úasil iss an fireoin,
do indis d’Eoin, mor in modh
a brathir da tsharugudh.
21. Rob fagus a cairdius coir
Pilip, hIruath agus Eoin,
indisi[d] in seanc[h]as sin
da deirbtshit[h]ir a da mathir.
22. Sarra ingen Gomeir glain
mathair Eoin alaind uasail,
Cassamaindra inge[n] glicc
mathir hIruaith is Philip.
p. 178.
23. Issi mathir Eoin gan ceas,
indisi[d] gach saidg a seanc[h]as,
issiat a n-anmand, ni ceil
Sarra agus Elizabeth.
24. Elisabeth, Sacairarsci
mathir athir Eoin Baisti,
issiat sin turgaib gu luath
Eóin, Pilip agus hIruath.
25. Adubairt Pilip rofes
re hEoin Baisdi ara cairdes;
‘eirigh is mill in mnai amach’
‘inmon in n-Iruath n-i[n]gantach’.
26. Andsein docuaidh Eoin iar sin
go teach hIruaith ingantaigh,
adubairt ris go teand trath
gan feis fre Heoriada.
27. Adubairt hIruath go mbladh
re mac seathar a mathar:
‘d[i]a faichfed re Pilip in bean’,
‘ni missi rosdeiligfed’.
28. Asbert Eriodes iar sein
re Pilip annsan uair-sein
gen go fa[g]bad fear gu brath,
nach biad ag Pilip aentrath
29. Dacuir Eriodeis iar sein
blicht seirchi saib ’na haidgi
tresa nderna[d] pudhar (f. 123d) truadh
d’fulair a gradh ar hIruath
30. Adubairt hIruath iar sein
is tigh frisna hingenaidbh:
‘dénaidh bhar ndhana fo seach’
‘nogo faichdis mo teadlach’
31. Adubradar na mna iar sein
re hIrúath ansan uair-sein,
nach dignidis dan gen on
go feasdais a d[t]uarustol.
32. Adubairt hIruath amach
agus rob e in radh uallach,
gu d[t]ibradh daib, fa amne,
in leath budh mo da rige.
p. 180.
33. Ronaisg ar hIruath ar sein
agus darat da brethir,
rogell ge mo mor in breath
go tibradh doib gan fuireach.
34. Darigni Neiptis iar sin
cuiseach bind asa belaibh,
Salia ic leim tar gach lear,
dias roheileadh aigneadh.
35. An[n]sein rocuingid amach
aisgi[d] eg[c]oir andli[g]theach,
ceand Eoin di for a meis amuigh
uair dabi ’ga n-indec[h]aidh.
36. Adubairt hIruath ’na thaigh
nach tibradh doib in n-aisgid,
is nach dergfadh ceand Eoin glain
ara mbi d’or ar in talmain.
37. Adubairt a muinntir ris,
re hIruath, acht gerb eisleis:
‘na bris do breithir, a righ,’
‘nach deach do reacht ar neffni’.
38. Andsin dochaidh hIruath trath
dera firtruadha fala;
is rodeonaigh doibh iar sin
Eoin da c[h]ur a cruadhc[h]arcair.
39. Tucadh do Modh Ruith (is do) rothogh
luach eir Eoin da dithceannadh
rob e luath Mo[g] Ruith iar sein
rogudh dona hingenaibh.
40. Iar sin dacuaidh Modh Ruith ran
do marbudh Eoin, gerb imnar,
go tug leis d’ hIruath a mbroit
ceand Eoin ar meis gil airgit.
41. Tresin sgel sin, baidh go mbloidh,
in feil Eoin ar Gaedelaibh,
nach bia do tshil Gaedeal nglan
acht madh æntrian gan marbudh.
42. In t-æntrian fuicfithear and
do tshluagh Gædeal agus Gall,
a meic Muiri, is truadh in dal,
a ndul ule do dubtham.
43. Fland Fína mac Gossa aird
meic Oraith on Greigh glegairg,
’se roc[h]um in sgel-sa thair
do tshil Ádhaim is da c[h]landaibh. Clanna Israel.
© 2007 Thesaurus Linguae Hibernicae