Colman mac Duach and Guaire

Author: unknown

Editor: J. G. O’Keeffe

An electronic edition

p. 44.

(MS p. 133b)

Colman mac Duach, diata Cell meic Duach, dochoid i
ndithrobaib i mBoirind Connacht & oen-maccleireach leis innaimsir
Guaire Aidne. Aigen & biel leo. Secht mbliadna doib
isin dithrub cen tuara bid o dune, cen acallaim duine. Eclass
leo ina caille & praintech. Croccind na n-allta is ed etach nobid
impu. Biror & usce lusrad na cailli is ed nochaithdis. In
maccleirech, is e ba hairchindech & ba secnap & ba ferrthigis &
ba coic isin praindtig.

‘Maith,’ or Colman, dia Casc iar celebrad, ‘is coir degurd
do denam ann indiu. Caisc mor andso & atat int oes uird uile
ann issinn eclais .i. misse & int archindeach & int espoc in
sacart. Lat-so immorro na huile comse olchena. Is coir dun
iarum degurd do denam ar bar mbelaib. Is coir duib-si didiu
maith do denam frinde isin laithiu-sea indiu Isu Christ meic De
bi.’

‘Rotbia maith, a clerigh,’ or in maccleireach, ‘& dena na
hurdu co maith. Acht co nderntar, regthair romut dochum
praindtigi. Ata maith and, ni coir a cleith ar ind aes graid .i.
arib-se for n-oes cumtha .i. tanic lon lim-sa don proindtig, &
berbtaiger lim-sa ar losaib na caille co mba hinmar, & biaid ar
do chind inn-irlaime.’

Dognither on in proicept & int aifreand co digrais. Celeberthair
medon lai. Tiagair don proindtig.

‘Is mithigh i n-anmain De do thaed do laim,’ or in maccleireach.

‘Is cet,’ or se.

‘Dober e,’ or e-seom.

Tucadh do-som iarum in sere.

Is ann tucad a chuidig do Guaire i nDerlus. Mor tra a
chuidigh-sidhe .i. cuach Guaire. Muc & ag doberthea and,
ceithri drolaim ass & da sab foe da breith ar a belaib, .i. da airig
tuile do chach.

p. 46.

‘Maith tra’ or Guaire, ‘robadambuideach-sa do Christ
comand nech lasmbad oc dil occorso cheli De nochaithed; ar
fogebtha dam-sa a n-irdail-se.’

A mbadar and, fochesathar in cuach uaidhib for ind leas.
Gaibthair a eich do Guairiu. Na da aingel imon cuach .i. iar
Maig Aidne siar co foromad in cuach ar belaib Cholmain meic
Duach ina praindtig.

‘Maith,’ or in maccleirech, ‘ata sund luag th’ainmne-seo.
Caith iarum a ndothidnacht Dia duid.’

‘Natho,’ or seisem, ‘co fesamar can as tucad,’ & adbered-seom
iarum la deicsiu in chuaich:

‘A chuachain,
cid dotuca dar Luaine?’

(.i. darsin fid i. Luaine ainm an fheada.)

‘A ernai[g]thi dogni-seo dofhug,’ ar int aingel, ‘& eslabra
Guaire.’

Is and tanic Guaire istech.

‘Dobroacht, a cleirchiu,’ ar Guaire.

‘Bes is Dia dodroid,’ ar in Colman

‘Cia heret ataid sund a cleirchiu?’ ar Guaire.

‘Cethrachait n-aidche ataam and & secht mbliadna.’

‘Is mithig duib a ndoroided duib do thomailt’ (MS p. 133b).

‘Cia atangladar?’ or Colman. ‘Inn e Guaire?’

‘Is e & is uad doroided a mbiad & is cet duib a thomailt, &
aso mo chorp-sa & m’anim duid & do Dia & mo shil & mo semed
co brath.’

‘Maith,’ or in cleirech, ‘rodbe a luagh la Dia.’

Doberthar arnabarach co mbadar ar Durlus & doberthar doib
tri fichit loilgech cona mbligreoraib & [con]a mbuachaillib co
mbatar ar dorus in proindtigi.

Conidh isin maigin sin rofothaighedh Cell meic Duach,
condad leis Aidhne uile & clann Guaire meic Colmain ossin
amach co brath. Finit.

Close this window