Cath Boinde
Author: unknown
Editor: Joseph O’Neill
An electronic edition
view the header | view the translation | view MS 23 P 2 on ISOS
p. 174.
(MS p. 351b)
Cath Boindi Andso
Rig rogob rigi for Erind feacht n-aill .i. Eochaid Feidleach
mac Find, mic Rogen Ruaid, mic Easamain Eamna, do shil
Rifaid Scuit, on tor Neamruaid ille, ar is do sil Rifaid
Scuid cach gabail rogob Eirind, cenmota Cesair nama.
Is airi adbeartha Eochaid Feidleach fris .i. feidil le cach he .i.
inraic la cach in rig sin. Ceathrar mac lais .i. na tri
findeamna (.i. Eamain ræd nach dealaigther, & d’æntairbirt
rucad .i. Breas & Nár & Lothar a n-anmand, & is iad
dorigni Lugaid tri riab n-derg rena siair bodein in agaig
reim chath Dromacriadid do thobairt da n-athair, corthoitsead
and na triur le h-Eochaid Feidleach, corob e Eochaid
Feidleach rochuindid in itchi næmda cen macc indeog a
athar for Erind cobrath; cor firad sin) & Conall Anglondach
mac Echach Feidlig, diatat Conailli la firu Breg. Bai
iardraigi mor lais in rig sin, la h-Eochaid Feidleach .i. Eili,
ingen Echach, bean Fheargaili mic Magach: is uaithi ita Bri
Eili la Laigniu - Ba bean hi, indiaid Fhergail, do Shraibgind
mhac Niuil do Ernaib, co ruc mac do .i. Mata mac Sraibgind,
p. 176.
athair Aililla mic Mata - & Mumain Etanchaithrech, ingen
Echach Feidlig, bean Chonchobair mic Fachtna Fhathaich,
mathair Glaisne mic Chonchobair, & Eithne, ingen Echach
Feidlig, ben aile do Chonchobur cetne, mathair Furbaidi mic
Concobair (& is airi adberta Furbaide de .i. a urbad no a
gerrad do rindead a broind a mathar iarna bathad ar glaiss
Bearramain risa raiter in Eithne iniug, & is uaithisi sloindter
in aband .i. Eithne & Diarmaid ainm Fhurbaidi) & Clothra,
ingen Echach Feidlig, mathair Chormhaic Chonloinges mic
Choncobair, no isi Neasa, ingen Echach Sulbaidi, mathair Chormaic
Chonloinges; & Deirbriu, ingen Echach Feidlig, diarobatar
muca Deirbrend, et Meab Chruachan, ingen Echach
Feidlig, bean aile do Choncobar, mathair Amalgaid mic Concobair,
conad he Concobar cet fear Meadba, co ro-treic
Meadb Concobar tre uabar meanman, co n-deachaid co
Temraid i fail i roibi ri Eireand. Is i cuis fa tuc rig Ereand
na hingina sin do Concobar, air is le h-Eochaid Feidleach
dothoit Fachtna Fathach i cath Litrechruaidi sa Corand,
conad na eric tucad sin do, mailli re rigi n-Ulad do gobail
do irreicin tar clandaib Rudraidi, conad he cet adbar comuachaid
Thana bo Cuailgne facbail Meadba ar Chonchobar
da a indeoin. (p. 352a) [Tindi mac Con]rach Cais do Domnandchaib
p. 178.
ise ba rig [Conn]acht in tan sin & Eochaid Dala & Fidig macc
[Feicc] don Gamanraid ic indleochus na rigi. Teit Fidic mac
Feicc co Temraid do theclomad na rigi do fein, corchuindich
Medb ar Eochaid Feidleach, co fuair Tindi mac Conrach fis
in sceoil sin, condarala do forairi for Fideic, conustarla tar
srothaib Sinda, co ro-marbsad clanna Conrach & Monadar
mac Conrach Fideic, conrad he sin ced adbar chocaid cloindi
Conrach Cais & na Gamandraidi. Dogni Eochaid Feidleach
anfir flatha ar Thindi, cor-chuir i n-dithrubaib Connacht,
he, & cuiris Meadb i n-inad rig i Cruachain, conustarla do
Meidb & do Thindi combo ceiligech iar cein mair na diaid
sin; conad i Cruachain ic Meidb dognithea aenaichi Erind,
& nobidis meic rig Erind i Cruachain ac Meidb in tan sin
dia cæmclodais cocad fri coiced Chonchobair. Co tainic
Sraibgind mac Niuil do Ernaib & a mac Mata mac Sraibgind
co Meidb dia cæmnasad cocad fri Concobar imcheand cach
formaid bai etarru. Gnithir feis Temra la h-Eochaid Feidleach
co cuicedaib Erend imi acht Meadb & Tindi.
Hirailid fir Erend ar Eochaid Meadb do breith sa n-aenach.
Cuiris Eochaid Searbluath a bain eachlach ar cend Meadba
co Cruachain. Teid Meadb arna marach co Temraid cor
cuiread graifne in aenaich leo co cend cæcaisi ar mis.
Scailid fir Erend na diaid sin. Anais Concobar tar eis
chaith san ænach ac forairi ar Meidb, condusrala do Meidb
dola co Boind dia fothrucad, co tarla Concobar di ann
p. 180.
co rosaraich hi & co ndeachaid na gnais da h-aindeoin, co clos
co Temraig sin, cor eirig rig Erend imach i Temraig & Tindi
mac Conrach & Eochaid Dala; & adeir aroile slicht cor thoit
Eochaid Dala re Tindi roime sin fan rigi, & ni fir sin.
Tocaibther mergi rig Erend d’indsaigid rig Ulad, cor
focrad comrac o Thindi mhac Conrach ar Concobar. Fæmais
Concobar sin, co tarla in tan sin ac Concobar Monodar Mor
mac Conrach, dearbrathair Tindi, co n-ebrad ris Tindi do
Chosc. Adbert co n-dingnead, co tarla doib imsreang
curad, cor toit Tindi san imguin co n-ebradar cach: - ‘is
maith in t-echt’ ar siad, co n-debairt in drai: - ‘bid mac
Cecht a ainm co brach,’ conad de ro len mac Eacht de.
Cor mebaid in cath for Boind ria Concobar for Eochaid
Feidleach, condrochair and Sraibgind mac Niuil & a mac a
congbail in chatha. Gabais Eochaid Dala cuing in chatha
(p. 352b) ar fiarud na Midi tar Sinaind Sribuaine, co ruc Meadb &
Condachta slan leis tre nert imgona, co narlamad he o Boind
co Sinaind. Teacaid Domnandaich & Dail n-Druithni &
Firchraibi dia roibi Eochaid Dala co Cruachain iar marbad
Tinndi mic Conrach Cais, air cer bo tri h-aicmeda re
scailed iadsen rob en aicme iar m-bunudas iad .i. clanna
Genaind, mic Deala, mic Loich, & do Fearaib Bolg iat
p. 182.
iar n-genelach; co rob i comairle do ronsad: - rigi Condacht
d’ainmneochad d’Eochaid Dala do deoin Meadba. Do deonaid
Meadb sin dia m-beith ne ceili di fein & cen et, cen oman,
cen neoidi do beith and, uair ba geis disi beith ac ceili na
m-beidis na trideada sin. Do rigad Eochaid Dala trid sin
co roibi trell i Cruachain na cheili ac Meidb. Is an aimsir
sin tanic Ailill, mac Mata mic Sraibgind, do Ernaib, co
Cruachain, & ba leanb óc Ailill in tan sin & iarsma cloindi
Sraibgind maræn ris dia oileamain oc Meidb tre gæl
Medba ris .i. Ele ingen Echach Feidlig a senmathair.
Oilter i Cruachain Oilill iar sin cor bo milig mor-menmnach
he i cathaib & hi comlondaib, & corbo tor chongbala
catha re Conconcobar he ic ditean choicid Medba, co rob e
ba taisech teglaich ac Meidb na diaid sin, cor gradaig
Meadb é ar a shobésaib, cor æntaich ria, cor bo ceili di
he tar cend Echaid Dala, cor edaich Eochaid imcheand
in sceoil sin & cor edaich Domnandaich uili tre chombaid,
cor shamailsead Ailill d’indarba i Condachtaib imach
cona roibi do Ernaib mailli fris, conar leic Medb in gnim
sin do denum uair robo dili le Ailill na Eochaid. Odchondairc
Eochaid leathrom Meadba focrais comroc ar Oilill
imcheand na rigi & a mna, cor comraicc doib co h-aindiarraid,
co n-dorchair Eochaid Dala sa comrac sin la
h-Ailioll mac Mata tre imdill Meadba. Gabais Ailill rigi
Connacht do deoin Meadba da eisi sin, corob é ba rig
p. 184.
Conacht ac rigad Chonairi Moir & ic tobairt thosaich na
tana for Ulltaib, conad don Ailill sin do ruc Meadb na
Maineada, & nir Maineada, a ced anmanda acht amail seo
.i. Feidlimid .i. Maine Aithreamail, & Cairpri, Maine Maithreamail,
& Eochaid, Maine Andoe, & Feargus, Maine Tai, &
Ceat Maine [m]Or[g]or & Sin, Maine Mils[c]othach, & Dairi,
Maine Bo-ebirt. Cid ara n-ebrad na Maine friu? Ni ansu.
Diambai Meadb oc aenach Cluitheamnaich laa n-ann, con
darala di turgnom catha Findchorad la Conchobar, dia
n-debairt fria drai: - ‘Cia lais torchair Concobar dom
cloind?’ ol si. ‘Nisrucais fos mina athbaisteir,’ ol in
drai, ‘cid on la Maine congeoidin,’ ol in drai conad airi
sin tuc si Maine for cach mac di, dia tuited Concobar les,
cor fort(p. 353a)amlaidead na foforanma sin na mac for na h-anmandaib
disli robadar forro, & ro shail Meadb cor be Concobar
mac Fachtna Fathach rig Ulad adeibairt in drai, & nochor
be, acht Concobar mac Artuir, mic Bruidi, mic Dungail,
mac rig Alban inall. Is e ro hoit and la Maine Andai
mhac Aililla & Medba. Finit.
© 2006 Thesaurus Linguae Hibernicae