An Crinoc

Author: unknown

p. 266.

(MS p. 40)

1. A C[h]rínoc, cubuidh do c[h]eol, cin co fat firoc, it fial,
ronmosam tuaidh i tir Neil tan doronsam feis reidh riam.

2. Rob hi m’aes tan ro[fh]ois lem, a be niata in gaesa grinn,
daltan cliabglan cæm nat cam, macan mall secht mbliadan mbind.

3. Bamar for bith Banba bailc cin eilniudh anma na cuirp,
mo li lasrach lan dot hseirc, amail geilt cin aslach uilc.

4. Erlum do c[h]omairli coir doigh nos-togham-ne in cech tir,
is ferr rogradh dod gæis geir ’na comradh reidh frisin Righ.

5. Ro[fh]ois re ceathrur iar sein im dia[i]dh cen nach methladh mer,
dofhedar, as beodha in bladh, at glan cin phecad re fer.

6. Fodeoidh dom-ruachtais a-ris iar cuartaib sgis, gleo co ngæis,
dodechaid temel tart gnuis, cin druis is dered dot aeis.

7. At inmuin lem-sa cen locht, rotfia mo chen-sa cin cacht,
ni leicfi ar mbadhadh i pein, fogabum crabud leir lat.

8. Lan dod labra in bith buan, adhbul do rith tar cach rian,
dia seichmis cech dia do dhan, roseismis slan co Dia ndian.

9. Dobere do timna ni toi do c[h]ach co himdha ar bith ce,
sithlai duin uile in cech lo, ni go guide dichra Dhe.

10. Dorata Dia debradh du[i]n are rit ar menman min,
rob rolaind frinn gnuis Righ reil iar n-ar leim or colainn crin. A. C.

11. Rogatar uaim cech sal sneid, doratar nem dam ’na diaid!
romgabat fir richid reill tan ragat iar ceim on chriaidh! A. Cr. c.