The Battle of Airtech
Author: unknown
Editor: R. I. Best
An electronic edition
p. 172.
(MS p. 724)
1. [D]oronad comtinol oc Ultaib ier tain ier ndith Corbmaic
i mBruidin Da Cocæ & dibertsat fou cumus Conaill Cernaig a
rige & tairget do fein a rige. ‘Ac amh,’ for Conald, ‘ni gebsa
hi, acht tabraid dom daltæ .i. do Chuscraid Mend Macha, ar
dochuaid ar mo luth & ar mo lamhchairi, acht nech conroinfe
comled fergnim & imdorægæ caill & mag remib i llo & ind
oidchi ind áth eislind ind agaid for namhot, ar it ilorda in gach
airm ietside, is eside is imcubaid daibsi di taisich imgona
ocaib.’
Ro gairedh gairm rig do Chuscraidh ieromh & nascaside a
gialla foraib, & as ann isbert Conall na briathrasa oc egaine
Concobair, & immorro Teguscc Cumscraidh:
2. ‘Atomrolscai (.i. ata com loscad) athgubai
nom credbad ceo trommchumad
do dith mo ruirech ruanadæ
in mind mail (.i. is ferr ict & alaig tainic) mochtaide
Concobair coemainich
clothrig clothEmnæ
ni fil mo niachus (.i. mo nert) dar aindir liuin seolæ
am dithracht am dimain d’eis sarglond sarEmnæ
ni follscaid feithe mo chuirp
ce itcloathar gnimh n-ard n-amhræ
bad n-e mo erthoghæ
cotom artad irt eter mo comchoicle
cona rudind mo gnimæ eter sirriti glaislaithe
p. 173.
i n-urd fiansæ macruidhe
mo chorp is crechtach
am dillid dimain dootair
d’éis aindreind ard Ulad
conid ed atomrollscai.’
3. ‘Artotroi (.i. eirig) a Chuscraid coemainigh
comheirig fri set soerathar
bat menci do dalai in cert coicrichais
fri turcomracc ndegdaoine
teta (.i. taidled) gnim gart (.i. einig) digruaide
fri hirad fearbbai (MS p. 725) ceo gabrai ailcedæ setaibh (.i. seoit imda do tiodnaccul).
Pat seirtid rechtgæ flaithemhain
Bat comaltach ferbbai fri n-oithib (.i. ba mait[h] do briat[h]ar ic comlaige fri cech oen fristibre).
Bid dluithi rechtge do dliged naro ercoillet do mifoltæ (.i. do mignim) tromtortha na tuath forollat (.i. atat) for do greiss.
Bat eolai in gech berlæ ar narbat ainfis i nnach dan conruidfe a fritacra friut. (.i. conraidfi nech frit).
Bat firen firbrethach cen forbrisiu n-indsciu etir tethrai tren & trug.
Niba conda midcuairt.
Morad maithe is toirr (.i. is dir) duit. Doerad anflathi. Dith bithbinech.
Bat err tnuthach tairptech dalach diubartach coc[th]ach, cosnamach fri hailecricha fri ditin do marcrich.
Bad frialmach debtha deine duiri doergairge arna tormaster fort iliuna len lighe
narotiasat narotethrat ar docloathar do tromliunna. iss ed atomrua.’
p. 174.
4. Ro fodail Cuscraid a fherann doib ier tain .i. dorat do
Conall o tuaith Inbir co Cobae .i. Cailli Conaill. Forbaid
FerBend for dí Tethba .i. Teathba tuascirt & Tethbai deisceirt.
Fir Malann & Fianclar na Bretchæ oc Glaisni mac Conchobair.
Irial Glunmar for Gull & Irgull .i. ferann Geirg mic Ebardirdil.
Follamain hi Fernmaig .i. Follamhuin oile ro marbad for Tanaid.
Maini um lochaib Erne. Lamai for Lamraige. Bendæ for
Corcai Oichi. Conaing for Mudorn. Fiacha for Ailiccrichi
Dirat Tir Lietmuine do Corc mac Dubthaig Doeltengaidh & di
Conri dia mac n-aile.
5. Ro fodail coiced nUlad di maicni Concobair & do cloinn
Rudraige amhail ba techtæ fon samla sin.
6. Batar maithe Ulad ica radha ba techta doib Feargus
mac Roich do tabairt chucæ & a sid do denam armad
treisiti a nert ind aghaid a namhat, ar batar mifoltæ vfer
nErend co mor friu, & bator ica n-oircnib & ica cerbad & aca
mbrétadh di cech aird. occus rainicc dno in fis co Fergus &
p. 175.
dogní side coræ fri hUlltaib & naiscis cach diobh a comarach
for araile.
7. Boi Medhbh ic tairmesc Fergusæ arna digsed i
nUlltaib & icfad sí cumalo a mac ro marbadh for bruigin fris .i.
Fiachræ Caoch & Illonn Find.
8. (MS p. 726) Luidh Fergus a morimmirci sair co hUlltæ &
Flidais lais. & is hi iarom tir conaitecht Fergus .i. ferond
Sualdaim meic Roich & ConCulaind .i. crich Cuailngne &
Muirtemne & crich Rois & in Brug mna Elcmair. Tucad
dosom dono in feronn sin & boisim intib side i n-aitreib corbó
marb Flidais occai occ Traig Baile meic Buain. conid deiside
dicoidsim ier toin co hOilill & Meidb ar nirbo maith a trebad
dar eis Flidhaisi, conid deiside fuairsim bas tier di enet Oilella
meic Matai.
9. Ro fas morcoccad mor andaide iter Oilill & Meidb &
Ultu im crich Malond ar doradad di Concobar í hi cinaidh
indeich ro milled uime di sluaighed Thanu. Asbert Medb na
tucc imdillsi a ferainn acht di Concobar namái. Isbertator
p. 176.
Ulaid na leicfidis uathadh é acht muna cosantai i rrói catha
friu é.
10. Ba hadbal & ba dirim in cocad ro fas etorra deiside.
Mor tres tren & mor d’echtaib occus d’aidbenaib & mor loech
londguinech atrochair din cocad sin. Is don cocad sin aroet
maithe Ulad di tuitim in Chuscraid & im Conall Cernach & im
Aimirgin mac Eicet & im Follamain & im Forbaide di mac
Concobair. Is de ro fas bas Ceit meic Magach occus Doiche &
Moga Corb occus Scandail & Ailella mac Mata occus Meic
Cecht & Belcon Breifne cona macaib.
11. Tarcomlad morsluagad mor la hUltai desidhe i coiced
Ol nEgmacht occus gabait for indred in tire rempu conrancator
crich nAirtigh.
12. Ro tinolsat dono teora Conachta ind agaid .i. Domnandaid
occus Fir Craoibe & Tuathæ Taitin. Hit iat so na
hairigh chatha ro batar oc feraib Ol nEgmacht .i. Mac Cecht,
Cet mac Magach, Maine Aithremail, Sanb mac Ceit, Maine
p. 177.
Maithrimail, Oilill Breifne, Loingsich Lochai Ri, Aongus Fer
mBolcc, FerDeichet mac FirDiad meic Damain, Oengus mac
Oilella Find, NIat mac Guill elech, Trogæ occus Flatri dá mac
Fraoig meic Fidaigh, Imchad mac Lugdach.
13. Is iad so na hairig chatha (MS p. 727) batar ic Oltaib .i.
Conall Cernach mac Aimirgin, Aimergin file, Maicne Concobair,
Fiacha mac Fergusa, Fergus mac Eirgi Echbeoil, Soach mac
Sencha, Fiacha mac Ilguine ri Fer mBolcc, Gula mac Geirg
meic Ebordil.
14. Nir leicsit dono fir Ol nEgmacht Ailill no
Medb léo isin cath. Digniet ierom catha commoræ comardæ
dib cechtor dilina occus ro indsaigh cach i cheile dibh i rrói
cath occus imbualtæ. Ro comraicsit iarom ocus ro gab cách
dib for truastrad i ceili ocus for trencuma. Ba hacgarb ba
haithighe ro ferad in gleo eter firu Ol nEgmacht ocus Ulta.
Bai tnuth & miscais ocus miduthracht oc cach dia cheile dibh.
Bui muirnn occus seselbi isin cath chechtordæ .i. buirfedach na
fer, iachtad na miled, cnetu & osnadhach na trenfer, beimnech
occus blesbarnach na cloidem, síanu & scretu na sleg ocus na
soicchet, occus becedach & golbemnech na carruc n-adbalmor
n-anbforustai oc beim fri sciathaib ocus luirechaib occus cathbarraib
na n-arcon occus na n-arsed. Ba mor tra ocus ba hadbal
in muirn sin, ar ni rabatar o sin anall loeich i lletheti loech
na haimsire sin ar luth occus lathor & lamach, ar med ocus
maisi & miadomla, ar crodacht ocus calmacht occus coscraide.
Ba mor dono occus ba hadbal muirn ocus mellgul, fuaim occus
fothram & tairmcritth in talman fo traigthibh na trenfer, slaitredach
na fer fortren ferdu gua tromtrascrad dicum lair ocus
lantalman. ro gab chach a comlond isin cath ier sin.
p. 178.
15. Dorochair Ailill Ardagach & Scandal da mac
Magach la Conall Cernach. Dorochair Oilill Breifne ocus Loingsech
Lochai Ri leis beus. Dorochair Oengus Fer mBolcc occus
Fer Deichet mac FirDiad la Chuscraid mac Concobair. Docer
Oengus mac Oilellæ la hAimergen mac Ecetsalaigh. Dicer
Niet mac Guill elech la hIrial nGlunmar. Diceratar Troghæ
ocus Flaithroi da mac Fraich meic Fidaigh la Glaisni mac
Concobair. Dicer Imchad mac (MS p. 728) Lugdach la Guala
mac Geirg.
16. Cid Ulaid dno dirochrator co mor isin cath. Diraipetor
la Cet occus la Mac Cecht, Conuing & Fiechæ da mac Concobair.
Dicer Corc mac Dubthaig la Sanb mac Ceit. Ro bith Gerc la
Maine nAithremail. Dirochrator comtuitim isin cath .i. Bendu
mac Concobair occus Cecht mac Ailella & Medba.
17. Ro srained trá in cath annside tria nertaib laoch occus
imbualtu & fosaighthe for coiced Ol nEgmacht occus ro len
cac[h] a tograim asin cath. Ro len Aimergin immorro in da
Eghthiar da mac Fergusa meic Roig condorchrator comtuitimm
p. 179.
ind Imliuch Ái. Ro tocbaisit Fir Ol nEgmacht mur derg ind
agaid Ulad ier sin, ar ni lentasa ár acht co toccaibti mur friu.
18. Ba se ind cath sin Airtich dia tainic dith
Domnannach. Ro soisit Ulaid día tigh cona morcosccar ier
sin. Is din cath sin itbert Genann mac Cathbad: Cath Airtich
cuirsim ar lo et reliqua.
© 2007 Thesaurus Linguae Hibernicae