The Edinburgh Dinnshenchas
Author: unknown
Editor: Whitley Stokes
An electronic edition
view the header | view the translation
p. 473.
(MS fol. 4a)
[53. BENN BOGUINE.] — Beand Bogaine, cid día ta?
Beand Bogaine .i. bo di bhuaib Flidaisi mna Oililla Find
adrullai ind, (f. 4b) & fíadhaigheastar ann sil na bo sin go rugastar
da læg .i. lægh fireand & lægh boineand, go silastar & go
fiadhaigsedar annsin a sil go nach feta ni doib. in tarbh robai
aco intan rogeisead dothigdis buar Erenn fua & noreithdís go
maidheadh a cridhe. Robi Findchad mac Neill for altrom la
hinghin n-Uatha. Luid in bo bai ’na beolo sein fo gheim in tairb
isin sliab. Luidh mac Neill ina deghaidh a buair, & gonais a buair
& gonais go slegaib na bu, conaca imbí in martghail sin, con-ebert
‘is boghuine so’, ol se, diamba Beand Boghuine go so.
Beand Boghuine is de dotha
rocualadar fir is mna,
don martgail[s]e, go lin ngal,
rognídh go fir la Findchad.
[54. MAG CORAINN.] — Mag Coraind, cid dia ta? Ni ansa.
Corand cruitire sidhe do Dianche[ch]d, mac in Dag[hd]ai, go
roghart sein asa croit Cælcheis do mhuccaibh Dreibrinde. Roraith
p. 474.
fothuaidh a niurt a chnamh, roraith a niurt retha læchradh
Ollnegmacht & a chuanart ’na deghaidh, go rige Ceis Coraind. Unde
Ceis [Coraind] & Mag Coraing. Vnde poeta cecinit:
Corand cruitire creachach,
mac in Dagh[d]a dianbhreathach.
ba guirt fri feis díanim sluind,
triana chruit go ceis Coraind.
[55. LOCH N-ECHACH.] — Loch n-Eachach, canas rohainmnigheadh?
Ri[b] mac Maireada & Echo mac Maireadha dolodar anneas
a hIrluachair andis for imirce & rodeagailset andis og Beluch da
Liag. Luidh indalanai siar .i. Eocho for Breogha go rogabh for
Brugh Meic in Og. Doluid sein chucu ir-richt brughad, & a
gerran ina laimh, & dlomais doib cona bedis isin Brugh. Atbertadar
fris nad bai acu cumang do imachur in ealma ellaig bai oga gen
chaipliu. ‘Cuiridhsi,’ ol se, ‘lan in maighe i taid do eiribh
cona n-irsibh ar in gearran sa & beraidh libh go maigin i laigfe foa.’
Dochodar as iarumh go rangadar Liathmuine. Laighid leo an
gerran i suidhiu & dobeir a mun ann, co nderna tobar dhe, go tanic
thairsiu, conid e Loch nEachach .i. Eochu in rí & fual a eich
roleath ann.
Doluid immorro Rib féin timcheall síar gor’gabh i maigh Fhind:
p. 475.
ba head on Tir Cluichi Midhir & Maic in Og. Luid fon indas
cetna Midhir & (f. 4c) cucu & capall cengalta lais, gon rallsat a
crod fair, gonos-rug leo gorigi Mag nDairbthean forsa ta in loch.
Laighid in gerran ann & dobeir a mhun gor’bo tiprat, gor’ muidh
tairsib. Ribh ainm in ríg. baiter in Ríb. Unde Loch Rí[bh] &
Loch nEchach nominata sunt.
Baidhis Ængus Eocho uais
tre fhual a eich go n-athluais,
doluidh Midhir, brigh ron-lean,
gor’ baidh Rib i Maigh Dairbthenn.
p. 476.
[56. LOCH N-ÉRNE.] — Loch nÉirne, cid dia ta?
Eirne ingen Buirg Buireadhaigh meic Manchin, banchoimhedaid
do chir comraraib Meadbha Cruachan, & bantaiseach ingenraidhe
fer Ollnegmacht. Intan iarumh doluidh Olca ái huaimh Cruachan
do chomrag fri Amhairghin Iarghiundach rochroith a ulcha ann
doibh [& roben a déta,] go ndeachadar for dasacht macrada &
ingenradha in tiri, go ndernadh a n-aidhead ann ar a omhon. Da
reith dano Eirne cona hingenraidh go Loch nEirne, go ros-baidh
in loch. Is desin ata Loch nEirne.
Eirne go n-uaill, comoll nglain,
inghean Buirg buain Buireadhaich,
si rotheich, ni gnim n-uabhair,
fo loch Érne ar imuamain.
Nó ba ferann do Ernaib fecht n-aile go robris Fiacho Labrainne
mac Senbotha meic Tighernmais cath forro goros-dílgend,
conidh iarsin do mebhaidh in loch fo tir nErenn. Unde est Loch
nEirne, et quod uerius est.
p. 477.
[57. SLÍAB BETHA.] — Slíabh Beatha, cidh día ta?
Bith mac Nai meic Lamhiach & Cessair ingen Betha & Ladru a
luamh & Findtan mac Bochra a maccæm dolodar for teicheadh
cethrachad laithi ria ndilind fodeigh doruimenadar na badh do
airimh in betha in t-innserad iartharach don bith o muir Thorrian
siar, & asbert Næ mac Lamhiach nis-leicfeadh son i n-airc.
Dolodar a ceathair ar imgabhail na dilend sin go torachtadar
Erinn & ros-baidh in dili amail dos-tarraidh in gach aird .i. Bith i
Slíabh Betha, Ladru i nArd Ladrann, Cessair i Cuil Cessra, Finntan
i Fert Findtain os Tul Tuinde. Robi bliadan lan i mbadhud conid
iarum ron-athnai arisi, & in barc i tudchadar isi go mbrui in
lear imon carraig ig Dun Barc iarna dusgudh a huisci dia cind
bliadne. Unde Sli(f. 4d)ab Beatha.
Rofhuair Bit[h] bas forsin t[s]leib
mac Lamhíach luchair lainfeil,
rombáidh in dili dedla
ua Malalein mor echta.
p. 478.
[58. COIRE mBRECCÁIN] — Coire mBrecan, can as rohainmniged?
Brecan mac Partholoin dochuaidh ar uaill & ingaire go tríun
sloig Erenn umi fo chumcha inbeatha for dimus. Is eadh leath rola,
forsin fairrgi mbaileadhaigh fothuaidh, gorige in sæbchoiri, & go
robaidhead ann, conid de ata Coire mBrecain.
Mac Parrtholoin, gnim gen gloir,
rofhúair samthoghail sirbroin.
Brecan na læchraidhe ille
ron-sluig sæbhchoire suighthe.
Nó gomad Brecan mac Maine meic Neill robaidhedh ann. Is e
a asna adracht fo churach Coluim chilli dia ndebert: ‘Is condalbh
sin, a shen-Brecain,’ et quod est uerius.
p. 479.
[59. BENN FOIBNI] — Beann Foibhne can as rohainmnigheadh?
Ni ansa.
Foibne feinnidh, is e rombuail Illand mac Erclaim meic
Doithre for lar Temrach os gualaind Eachach Ailtleathain meic
Ailella Caisfhiaclaich. Luidh iarum fothuaidh arfud Breag. Roslac
Feargna Fear Ga[i] Leatha[i]n ina dhiaidh, & immusracht
remhi as gach beinn in-aroile go riacht in beind ud, conidh ann sin
rodoimeart. Unde Bean Foibhne.
Foibhne feinnidh, fuachdha in fear,
luidh o Themhraigh i tír mBreagh.
i cinaidh Illaind na n-ead
rombi Fearghna, ba frithbhed.
[60. ARD FOTHAID.] — Ard Fothaidh, cid dia ta? Ni ansa.
Fothadh gonatuil ann go ceand naí mís fri foghur circi Boirci
dia mbai for a echtra. Unde Ard Fothaid.
p. 480.
Fothad Airg[th]each, glan a gluais,
ro thuil ann cona athluais,
fri re nai mis, monor ngle,
fri fogor circi Boirche.
[61. ARD MACHA.] — Ard Macha, cid dia ta? Ni ansa.
Macha ben Nemidh meic Agnomain atbath ann, & ba he in dara
magh deg roslecht la Nemhead, & do breatha dia mhnai go mbeith
a ainm uasa, & is i adchonnairc i n-aislinge foda reimhe a techt ina
ndernad do ulc im Thain bho Cuailngi ina cotludh tarfas di uile
ann rocesad do ulc and do droibhelaib & do midhrennaib, go ro
mhuidh a cridhe inti. Unde Ard Macha.
Nó Macha ingen Ædha Ruaidh meic Baduirnn, is le rotoirneadh
Eo(f. 5a)muin Macha, & is and roadnacht día ros-marbh
Rechtaid Rígderg, is dia gubhu rognídh ænach Macha. Unde
Macha magh.
Ailiter, Macha dano bean Cruind meic Agnomhain doriacht ann
do comrith ann ri heocho Conchobair, ar atbert a fear ba luathe
a bean inaid na heocho. Amlaidh dano bai in bean sin, inbhadach,
go ro chuindigh cairde go ro thæd abru, & ní tugadh di, & dogní in
comhrith iarum & ba luaithiamh si, & o roshiacht cend in chede berid
mac & ingin, Fir & Fíal a n-anmann, & atbert go mbeidis Ulaidh fo
cheas oitedh in gach uair dos-figead eigin, conid de baí in cheas
for Ultu fri re nomaide o re Conchobhair go flaith Mail meic Rocraide,
& adberar ba si Grian Banchure ingean Midhir Bri Léith, &
p. 481.
adbeb iar suidhiu & focreas a fert i nArd Macha, & focer a
gubha, & roclannad a lía. Unde Ard Macha.
Atchonnairc Macha marglic
tri fhis, ratha na raidmid,
tuirthechta trimsa Cuailghne
fa gnim ndimsa nimuaibre.
p. 482.
[62. MAG COBA.] — Mag Coba, cid día ta? Ni ansa.
Mag Coba cuthchaire. Nó Coba cuthchaire feisin .i. cuthchaire
Eremoin meic Míleadh, is e cétna roindlestair cuithigh i
nErinn. Atnaigh a chois indi dus in bad doith ina cuithigh, go
romuidh buinde a sliasta & a da dhoid, con-ablad de. Is de sin ata
Mag Cobha. Unde poeta dixit:
Cobha cuthcaire go ngloir
ardri[g] Erend Eremhoin,
is e rosdeadhlad de
Coba cennmhar cuthchaire.
[63. SLIAB CALLAINN.] — Sliab Kallan, cid dia ta? Ni ansa.
Callann conbhuachaill Buidhe meic Bain blaidh meic Forgamhna
forobar[t] in Donn Cuailghni in mi riana re coir .i. dairi
int[s]easgraidhi imbi forrobartar & in cu [oc cosnam in tsescraigh
co torcair in cu di sodain] Nó gomadh ig tabairt na tana
comcomult in choin arin talamh. Unde Sliab Kalland.
Calland conbhuachaill crethaigh
Buidhe mac Bain bithbreathaig.
glecais frissin nDonn Cuailghne
ba forlonn fri heduailghne
p. 483.
[64. SLIAB FUAIT.] — Sliab Fuait canas rohainmniged?
Fuad mac Bile meic Breoghain, is é robo rí Ua mBreoghain.
Taraill inse ar in fairrge [oc tuidecht la macaib Miled] dochum
nErend, & gach æn nofuirmheadh a bond fuirri ni abrad gaí nó
breig. Tug fod fírindi lais (f. 5b) asin indsi. intan adbereadh gai
dochuiredh a fæsgul suas, & intan atberead firindi dochuireadh
a chain suas. Ata in fod sin isin tshleib beus, & is fair dorochair
in graindi o gherran Padraic, conidh adrad sruith[i] ardaigh na
firinde do choimhet. Unde Sliabh Fuait.
Nó gomad in fod doradad for Ceand mBerridi do
imarchur, ar rothairgsead Ulaid righe don ænfhir noberadh corp Conchobhair
go hEamain oda Mag Lamhraidhe gen fhuirmeadh, go
rogabh Ceann Berride fair, go roisead Sliabh Fuait, go tard a bonn
fri lár i Sleib Fuait. Adbertadar Ulaid na bad rí aire sin e.
Atbert som fod go leithead a bonn do thabairt fair. Doradadh on
go roacht Emhain. Conid ann dobhath, conidh desin ata ‘righe
Chind Berride’.
Fuat mac Bile chæimh cruadhaigh,
ua Breaguin buirr bithbuadaig,
tuc ar rod fear luchta ille
fod fors’tuc[tha] firinde.
p. 484.
[65. LIA LINDGADAIN.] — Lia Lindghadain, cid dia ta?
Li[ngadan Labar, issé no chosced slú]agh Erenn i flaith Find
meic Findtain, & ni lamtha labhrad leis for muir na for tír gan
íarfaighidh do son, ar is e robo sluag-rechtaire fer nErenn. Rolabrasdar
fecht n-and fria di chulaidh asin carraig [in] mac alla a
gotha. Imsai fris anall do dhighail a gotha fair. Dan-arraidh
barr na murthuinde & ran-esart frisin carraig, conidh romarbh fodiadh.
is and bai ceand a shæghail. Unde dictum est:
Linga labor, fear go mblaid,
robai i n-aimsir Fhindtain.
rofæn in[fh]airrgi go foll
ria thæbh chairrgi gan chomhlaind.
p. 485.
[66. MAG MUGNA.] — Magh Mughna, canas rohainmnigheadh?
Maighnia nó Mairgnia .i. morgnimh feadha daurbhile mora
roasai ann, comtír coimhleathna a mbarr frissin magh. teora toirthi
fodocheardais in gach bliadain [.i. dearcain & ubla & cnai.] Intan
dothuitead in dearcu dedhenach is and nofhasadh blaith na
ce[t]dercan dib, conidh taibhdeisdear Ninne eigeas, go ro leagh
riamh condergan ailind de .i. níth nemhannach, & is desin ata
Magh Mugna.
Mughna durbhile gan on
forsa mbid meas is torudh.
ba comhleathan a barr becht
frisin magh mor gan eigeart .i. aine orda.
p. 486.
[67. FINDLOCH CERA.] — (f. 5c) Find loch Cera, cid dia
ta? Ni ansa.
Enlaith tiri tairngiri dodheachadar and do fhailte fri Padraig dia
mbai i Cruaich Aigle. Rofearsat gles forsin loch goma findithir
lemnacht, & rochansat ceol ann gen bhai Padraic forsin cruaich.
Conidh de sin ata Findloch Ceara. Doluidhset tar muir alle
enlaith tire tairngire gor gellsad in loch darlibh i coindi Padraig
portghil.
[68. MAG TAILTEN.] — Mag Tailden, cid dia ta? Ni ansa.
Tailltiu inghen Maghmhoir rig Espaine, ben Eachach Gairbh
meic Duach Teimhin. Ba si mumi Loga meic Eithleann, & isi
roclaidheadh in magh. Nó is and atbath. Dia taide fogumhair
roladh a fert & doronadh a gubha & roacht a nasad la Lugh [unde
Lugnasa(d) dicimus. Coic cet bliadan immorro & mili ria ngein
Crist andsin, & nognithe ind ænach la cach ríg nogeibed Eiri co
tainic Patraic, & coic cet aenach i Tailltin o Patraic co Duboenach
Dondchada (meic Flaind) meic Mail-sechlainn]. Ocus it e teora
gesa Tailtean: techt tairse gen tairleim, a deagsain tara ghualaind
clí ig taidhecht uaithi, faisdibhrugudh fuirri iar fuineadh ngreine.
Unde Magh Tailten.
Tailltiu ingean Magmhoir mhoill,
is i sin ro ben in choill,
bumi Logha luaidhit fir,
baile in teidi-sea im Thailltin.
p. 487.
[69. BENN BAIRCHI.] — Beand Bairchi, cidh dia ta? Ni ansa.
.i. Bairche boaire Rosa Ruaidhbuidhi, ba headh a shuidhi
mbuachalla, in bheand, & is cuma argairead gach mboin oda Dun
Sobairce go rige in mBoaind, & ni geilead mil dib mír foroil seach
araile, conaidh desin ata Beand Bairchi, amail asbert:
Bairchi boaire gu mbladh
baí ag Rosa Ruadh roneartmhar
in beand, nach tlaith re duba,
a suidhi blaith buachalla.
p. 488.
[70. TRAIG TUIRBI.] — Traig Tuirbe, cidh dia ta? Ni ansa.
Turbe Traghmar, athair Gobain sair, [is e rodon-seilb. Is on
forbbai] is e focheirdeadh a urchur dia biail i Telaigh Bela
inaghaidh in tuile, co n-ergaradh in fairrgi [& ni tuidchead tairis].
Ocus ni feas a geinelach acht masa dinibh teasbadhchaibh
æsa dana atrulliath a Temraigh ria Sam-ildanach fail i ndiamraib
Breagh. Unde Tráig Tuirbe.
Tuirbe trágmar ba fear feimh,
athair Gobain go nglainmhein,
ni fes a geinelach gle:
uad ainmnigther Traig Turbe.
p. 489.
[71. LUSMAG.] — Lusmag, cid dia ta? Ni ansa.
IS as tug Diancecht gach lus n-íce conammalt ar thiprait
Slain[gi i n-Achad Abla] fri Mag Tuired aniarthuaith, intan bai
cath etir Tuatha De Danann (f. 5d) & Fomhoire. [Gach aen
do Thuathaib De Danann no laigtis fon lind lusraid sin atraiged
slemun slancrechtac[h].] Unde Lusmag.
Diancecht dorat leis alle
gach lus o Lusmhaigh luaidhe,
go tiprait na slainti suaill
fri Magh Tuiread aniarthuaidh.
p. 490.
[72. BENN CODAIL.] — Beand Codhail can a[s] rohainmnigeadh?
Ni ansa.
Codhol Coirrchicheach is e rob aide do Eirind diata Inis
Erenn, & is ann tairbreadh a dalta for in beind ud, & nach tairbert
dobeiread furri conogbhadh in talamh foaib, & mairberead Eiriu
atumadar suas go tiagat a goth gæithe fu domhnaib a cluass
man[i]abrad (sí) sin & nofhasfadh gomadh reil Eire uile as, & an la
domela comarba Erenn no rí Temrach tuara Codhail nó ní
d’enlaith nó d’fíaduch nó di iasc, forbraid a ghal & a slainte.
Unde Beand Codhail.
Codhal Coirrchicheach go n-aibh
topghais Erind abradchain,
manbadh Eriu cæmh monur
cia cia bad leiriu cæmhchodhul.
[73. TLACHTGA] — Tlachtgha canas rohainmnigheadh? Ni ansa.
Tlachtgha ingean Mogha Roith fordos-reibleangadar tri meic
Simoin druadh dia luidh le hat[h]air da foglaim druidhechta i
p. 491.
n-airthiur in betha, fodeigh is i doroighni in Roth Ramach do
Thriun & in lia i Forcarthu & in coir[th]i i Cnamhchaill. Ternai
iaramh anair [&] in dedha sin le go torracht tealaigh Tlachtga.
Fordos-lamnad annsin iarum go mberdais tri maccu .i. Doirb,
dia ta Magh nDoirbi, & Cuma, dia ta Magh Cuma, & Múach, dia ta
Magh Mu[a]ich. I cein dano beid in[na] anmand sin i cuimni
fear nErenn ní thora dígal n-echtrann docum nErenn. Ocus
atbath dia hassaid, & is uirri dorindeadh in dun. Unde Tlachtga.
Tlachtga inghen Modha moir
ros-lebhlan[g]adar meic Simoin.
onn uair thanic dar muir mas
is di ata Tlachtgha tæbghlas.
[74. INBER CICHMAINI.] — INber Cichmaine can as rohainmnigheadh?
Ni ansa.
p. 492.
Cich-maine Adhnai mac Ailella & Meadhbha, ar ba Maine
Adnai in sechtmad mac do Ailill & do Meidhbh, ut supra diximus.
IS e dano in Maine sin forruidbigh Feargna mac Finnchoime oc
cosnam churaigh forsin tracht.
Nó Cichmuine mac Ailella find fuaradar araile iasgaire ic
telach [al lin & a cocholl, coro marbsat isin inbiur (ucut). Unde
Inber Cichmaini.]
Egerton 1781, fo. 75b.
[75. LOCH CÉ.] — Loch Cé, canus rohainmnighedh?
Ni ansa. Cé .i. drái Nuadhat Airgetlaim meic Echtaigh meic
Eterlaim rotáet a cath Maige Turedh iarna guin isin cath co rainic
Carn Coirrslébhi & co rainic in Magh Airni a fuil in loch, & docer
Cáe ann sin, conid ica idhnacal ro mebaidh in loch. Unde Loch
Cé.
H.3.3 p. 66b
Loch Ce, canas roainmniged?
Ni ansa. Antan rofechta cath Muighi Tuiredh eter Fomorchaib
et Toatha De Danann, rogonadh dno ann drui Nuadat
Arccetlaim maic Echtaig a fritguin an imair[i]g. Cé a ainm-side.
La sodain doriecht roimi sierdes on muigh co torracht Carn
p. 493.
Corrslébe, co ndeissed as-suidiu iar scis ghona et uamain &
imtechtai acht chena is suaill nar ’bo marb focetoir. asiu rofaccadh in
carn forar’ dheissed. Rosill uaid sairtuaidh cachndireach co facca
in mag minscothach. Ba lainn lais rochtain an muighe atconnairc.
Luid rome for an amthas fon indus sin co larmhedón in muighe,
ait a mbui carrac cobsaidh comadbul, conadh [ón] drai rohainmnigthe
.i. Carrac Ce, conadh fon cairn roladh fo talmain iarna
eibelt. Intan iarum roclas a fert is ann [ba] tomaidm an locha
taris et tar[s]in magh olchena. Unde Loch Ce.
Egerton 1781
[76. MAG nDUMACH.] — Magh nDumach, cidh dia ta?
Ni ansa. Cath doratadh imna tri druimnibh ada dech bái a
nErinn .i. Druim Crecht (f. 76d) & Druim Betach a cuit Eremoin
& Druim Fingin a cuit Ebir. Ba bec la hEber ændruim isin leth
thes & a dó sa tir tuaidh, & atbert Erimon na bad athroinn uad dia
cuit. Fertar cath etarru. Romebaid tra for Eber, condorcair ann
Eber & Palap mac Eremon la Conmæl mac Cathbad, & rogníad
dumad[a] ar in læchraidh annsin. Unde Magh nDumach, & Tendais
a ainm ar tus. Unde dicitur:
San cath for Tenndais na treabh
sin muigh a dorchair Eber,
a dorcradar ann malle
Goistin, Sétga, ocus Suirge.
p. 494.
A tochar etir da magh
in cl. fri bothar n-air
Eber mac Miled cobecht
is ed a leacht anasb.
Unde Mag nDumach dicit[ur].
[77. CNUCHA.] — Cnucha, canas rohainmnighedh?
Ni ansa. Dia tangatar .u. meic Dela meic Loith cho Erinn,
Gann & Genann & Rudraige & Sengann & Slaine, doratsat .u.
righna leo .i. Fuat ben Slaine a quo (sic) nominatur Sliabh Fuait
& inisin Fuata, Etar ben Gainn, isí atbath i nEtur, & is uaithi
p. 495.
ainmnigther Etar, Anust ben Sengainn, Lí ben Rudraigi, Cnuca
ben Genainn, is i conapaid ’sin tilaig sin, & is inti roadhnocht,
conidh uaithi ainmnigther Cnucha.
Coig mna tucsatar aleth
coig meic Dela can duilgi,
da mnai dibh Cnucha co mbladh
is Etur o trocht imglan.
Atbath Cnucha sunna tra
san cnuc ria n-abar Cnucha,
atbath Etur ben Gainn gluair
a mBen[n] Etair re henuair.
De sin ata Étar án
is Cnucha cétach comlán,
is inis Fuata can ail
ocus Sliabh Fuait co morblaidh.
No Cnucha ingen Connaidh a hiathaibh Luimnigh, buime
Cuinn Cétcathaig docoid ann do tham ina tigh fen [& do hadhnaicedh
la Connaidh (?) isin chnuc ugad .i. Cnucha. Unde
Cnucha dicitur].
© 2007 Thesaurus Linguae Hibernicae