The Prose Tales in the Rennes Dindsenchas
Part IV: First Supplement, extracts from the Book of Lecan
Author: unknown
Editor: Whitley Stokes
An electronic edition
view the header | view the translation | view the Book of Lecan (RIA 23 P 2) on ISOS
p. 135.
(MS p. 481b)
131. MEDRAIDE.
Meadraide, canas rohainmniged?
Ni ansa. Meadraide mac Torcair meic Tromda meic Calatruim
a hinis iartharaich Espáine tanic le Mac con a n-Erind,
cor’gab isin tracht [n-ucut]. Unde Meadraide dicitur.
ITem for Ath Cliath Meadraidi fos .i. Cliath mac Cuilind
meic Duib-duind do muintir Meic con adrochair and. Duibri
mac Dubain meic Deirc do muintir Meic con fos, a quo Duibri,
[&] Neidi Nithgonach, a quo Usce Neidi, & Gaeth mac Nechtain
meic Fhirmoir meic Erimoin meic Rois meic Inbirmuigi .i.
cliamain Meadraidi, [&] Marcan mac Duinn meic Dathaich
do muintir Chuind cétchataig, & Gaillim ingen Breasail ranic
dia fothrucun cusin abaind, a quo Gaillium, & Laigen Gairbliath
mac Dairi meic rig Espáine, a quo Ath Laigin, Failend
mac Illaind meic Ne[i]r tanic asin traig do thaeb na Greci do
p. 136.
choba[i]r Meic con, a quo Inis Failind, [&] Boireand mac
Bolcain meic Bain meic Illaind a hEspáin tainic co Boirind
Corcomruad, a quo Boireann.
132. CARN FRÁICH.
(p. 485a)
Carnd Fraich, canus rohainmniged?
Ni ansa. Dia tarla Cond Cetchathach & Eogan Taidlech i
p. 137.
comflaithis fo Erind iarna roind d’Escer Riada on Ath cliath
co chele .i. Ath cliath Meadraidi & Ath cliath Duiblindi. Bai
dono fendid la hEogan, Fraech Midleasach mac rig Espáine, &
bai oc argain co Cruachain cach re n-uair. Fecht and dodeachaid
co Cruachnaib Ai do tharclom chreichi cor’ gobsad crod
na Cruachna. Bae Conall Cruachan .i. oidi Cuind, ’ca feitheam,
cor’ lean iad & a cethrar mac .i. Corc & Connla & Cetgen
Cruachan & Fraech, co rucsad for[r]o ac Meadraidi, airm a
roibi Eogan boden. Cor’ cuirsead coibleng curad eaturru, co
tarrla Fraech mac Conaill Cruachan co hEogan, cor’ gon co
coimsech Eogan. Dorala Fraech mac rig Espáine arbelaib
Eogain, cor’ chomraic doib in da Fhraech, cor’ thoit Fraech
mac Conaill ’san irgail. IAr toitim in churad doiadsad Tuatha
Taidean & Fir Domnann & Cruithnich na Cruachna, & Conall
fodesin & a tri meic aile, & nir’ licsead a fhodbad, & dodichuirsead
Muimnich arcur a n-a[r]m (p. 485b) ic Ath Meadraidi,
cor’ beanad a cro & a crech dib. IAr femead a leanmana do
Chonall cona clandmaicne, dothocbadar leo Fraech co Cnoc na
dala ria Cruachnaib sairrdeas, cor’ hadlaiced ann he, conad
uada sloindter in carnd. Unde dicitur Carnd Fraich.
Ailiter Carn Fraich .i. Fraech mac Fidaig dodeachaid do
serc [Fh]indabrach do chrothad in chaerthaind robai ar dublind
Brea risi n-abar in tShuca indiu, cor’ airig pest bona in chaert[h]aind
he, cor’ len & cor’ geogain co mor, co tuc Fraech a
coscur & in caerthann co Meidb, co roibi ’ga fothrus isin
charnn, conad[d]e dogairther Carn Fraich. No comad and fogabad
bas lasin pest, & a adnocol ’sin charnn beos.
Ni head sain a fhir, acht la Coincul[ainn] dothoit a comrac
usci ar Tain bo Cuailcne i n-Ath Omna ar bord Slebe Fuait.
Tareis a baiti la Coinculainn dochonncadar fir Erenn in bandtrocht
mor dia saigid co corp Fraich, & dolicsed gair mor osa
chind, & tocaibsead leo ’sa sith. Sith Fraich immorro ainm in
tsidha osin inall, conad da dearbad sin rochanad so:
Carnd Fraich, ca hadbar dia fuil. &rl.
p. 139.
133. ARD NA RIAG.
(p. 492a)
Ard na riag, canas rohainmniged?
Ni ansa. Dia rogob formot & firmiscni Cellaich maic Eogain
p. 140.
meic Cellaich meic Ailella Muilt meic Dathi meic Fiachrach a cridi
Guairi Aidne meic Colmain cor’ guidistair ceathror comalta
Cellaig um marbad Chellaich .i. Mael-Croin & Mael-Senaich &
Mael-daLuad & Mael-Deoraid, & dodeonaigedar na comaltada
sin cor’ marbsad Cellach tre furail Guairi & tarcenn
chomthach mor.
IAr marbad Chellaig da chomaltaib dobi Cu-choingelt mac
Eogain ’na n-iarmoracht, co fuair iad ac Sal Srotha Deirg, co
ruc leis co Tulaich na Fairscena iad da riagad, co ro riagad
and iad, conad uaithib ainmnigther in t-ard. Unde dicitur.
134. INBER MBUADA.
(p. 492b)
INbear m[B]uada, canas rohainmniged?
p. 141.
Ni ansa. Dia tainic Parrthalon mac Sera meic Sru meic Esru
meic Gaeidil Glais, ó taid Gaeidil, asin Greic iar marbad a
athar & a mathar & a braithrech um chenn a forba, dia roibe
sechnon in domain in [leg. ó] cach thir do thir, co ranic fadeoid
co hErind, cor’ gob cuan & calad a n-Inis Saimer. Dam
ochtair a lin, co roibi re trell isin chuan sin. IAr scithlim a
loin immorro do[g]nidis fiadach & enach & iascach. Uair ni
[fh]uair Parthalon a n-inbir na ’n-abaind i n-Erinn co tanic co
hInber mBuada, co rob and do[fh]uair iasc ar tus, co ndebradar
muinter Parthaloin: ‘Is buadach in t-indber!’ ol siad.
‘Biaid in t-ainm sin fair,’ ol Parrthalon .i. Inber m[B]uada,
et unde dicitur Inbor mBuada.
135. DINDA HÚA N-AMALGADA.
(p. 493a)
Do dindaib Ua nhAmalgaid andso .i. Carnn Amalgaid & Tir
p. 142.
Amalgaid & Fearsad Threisi & Inis Amalgaid for Loch Con &
Mag mBroin la Húu Amalgaid, canas ro hainmniged?
Ni ansa. Carn Amalgaid .i. Amalgaid meic Fiachra. Elgaid
mac Dathi meic Fiachrach is lais rotochlad in carnn ’cum
aenaig Húa n-Amalgaid do denam ’na thimchell cacha bliadna,
& do fheitheam a long & a coblaig as & ind, & dia adnocol
bodén.
Amalgaid mac Fiachrach meic Echach Muidmedoin, is uada
ro hainmniged Tir Amalgaid.
Fearsad Treisi immorro cid diata? Ni ansa. Treisi ingen
Nad-fraich bean Amalgaid meic Fiachrach meic Echach Mugmedoin
do baidead innti, conad uaithi ainmnichthear, conad ria
aderar Fearsad Ratha Branduib indiu.
Inis Amalgaid, cid diata? Ni ansa. Dia ndechaid Ruad ingen
Airdig Uchtleathain meic Fhir-choca, bean Dathi meic Fiachrach
du thuismed a toirchiusa co hoilen for Loch Con, co ruc mac
forsan indsi .i. Amalgaid mac Dathi, conad uada sloindter an
indsi .i. Inis Amalgaid; & is aitreb naemda ind oilen sin.
Mag mBroin, cid dia ta? Ni ansa. Bron mac Alltoid dearb[b]rathair
Manannain meic Alloid, is e rosslecht a fidbaid in
mag, conad he a ainm fil fair .i. Mag mBroin, ocus derb[b]rathair
aile doib Ceiti mac Alloid, dia ta Mag Ceidi. Conad do
chuimneochad na ndind sin rocanad so:
Seanchos Chairn Amalgaid fheil &rl.
p. 143.
136. MAG TIBRA.
(p. 494a)
Mag Tibra, canas rohainmniged?
Ni ansa. hIrial faid mac Ereamon meic Milead Espáine, rig
p. 144.
hEr[e]and & Alban, & tanic Irial timchell Erend inacuairt, co
riacht co hIndber Chairnd Glais risi n-abar Inber mBuada, &
tanic da acallaim aindsen a buime .i. Tibir ingen Chais Clothaig
do Thuathaib de Danand, co ruc le rig hErind dia dunad
bodesin .i. co Mag nGlas. IS andsin dogob galar æga rig
hErenn, co testa a ndun a buime. Tancadar fir Erenn fo thasc
in rig co riacht[atar] dun Tibra, & dothocbadar leo he co reilic
idlaide na Cruachna, cor’ hadlaicead and he. Dochuaid Tibir
isa muir dé bathad do cumaid a dalta, co tucad i tir hi
iarna bathad do thonnaib in mara, cor’ hadlaiced hi ’sa moig
sin re taeb na trága, conad uaithi ainmnigthear in mag .i. Mag
Tibra, & is dona gairthib mora doligedar lucht in baili i[c]
cainead rig Erenn & a buime ita Tulchan na nGairthi.
p. 145.
137. SLIAB NGAM.
(MS p. 494a)
Sliab nGam, canas rohainmniged?
Ni ansa. Gam Gruadsolos .i. gilla (p. 494b) Ereamoin moir
meic Milead Espáine, is he rosharaigsead na hamaidi no na
maidi im a cheann, & robeansad de he, & rolaisead uaidib isin
loch no ’sa tibraid in cend, & is don buaidred tuc in ceann
forsin tibraid ita blas searb fuirri indara fecht & in fecht aile is
firusqui. Conad on Gam sin ita Sliab nGam.
138. LOCH GILE.
(p. 498a)
Loch Gili, canas rohainmnigead?
Ni ansa. Romra & Omra, da ri robadar sin moig dia ta in
p. 146.
loch. Bai ingen la Romra .i. Gili a hainm, Dia rochuindig
Omra do mnai Gili ingen Romra co r’er & co r’eitig an ingen
eseom. Dia ndeachaid Gili la dia fothrucad co tobar robai forsin
maig an aimsir bai snigi ann co facaid in fear bai ’ca cuindgid
osa cind, cor’ba marb do nairi in ingen, co fuair bas isin
tibraid. Co táinic a buime ’na docum ’na diaid sin, co ra chaí,
& is dona deoraib ro muidsedar uaithi ’sa tobar dorindi in loch,
& o Gili ingin Romra rohainmniged. Unde Loch Gili dicitur.
Corbo marb Omra do laim Romra a ndigail a ingine, & domebaid
cromaidm cumad da chraidi ’na cliab fodesin do chumaid
a ingine, conad uaidib na da charn .i. carnn Romra &
carn Omra. Conad doib sin rocanad:
Ingen Romra, Gili glan, &rl.
p. 147.
139. ÁTH LIAC FIND.
(p. 501b)
Ath Liag Find, canas rohainmniged?
Ni ansa. Cath doradad itir Fhind mac Cumaill & Fland mac
Echach Abradruaid, conid annsin doroacht Sideng ingen Mongain
Sídig co lig co slabrad oir do Find mac Cumaill, co
tard sin a laim Guaire Guill, co tairnic airm Fhind do chaithim,
conid iarum tairlig [a lic], co torcradar de tri meic
Echach Abradruaid .i. Bran & Seanach & Senan, & torchair in
liag isan ath, & ni fhagaib nech conasfagaib Bé-tuinde ingen
Nothra nó Chalaind meic Conchind, conid hi dombeir araird madain
domnaig, & secht mbliadna iarum co brath. [Unde Ath Liac
Finn].
p. 148.
140. DRUIM CRIAICH.
(p. 502a)
Druim Criach, canas rohainmniged?
Ni ansa. Druim n-Airthir a hainm artus, co tardsad na tri
Find-eamna cath dia n-athair ann, d’Eochaid Feidleach, do rig
Herenn .i. Breas & Nar & Lothar a n-anmand, & a n-Eamain
Macha dono rohoilead iad — nó eamain cach raed cengailti,
& do oentairbert rucad iad.
Lodar tuaithbel Erenn tar Febal & dar Eas Ruaid & dar Duib
& dar Drobais & dar Daill & dar Sligech & dar Senchorann &
dar Sengais & dar Mag Luirg & dar Mag n-Ai & dar Mag Cruachan,
conad andsin rosiacht Clothra a siur & rochai friu &
ros-poc, & adbert: ‘Ba saeth lim beith can clanda!’ & rochuindich
a coimlebaid, conid[d]e dorala Lugaid Riab ndearg
mac na tri Find-eamna. IS airi dono doronnad sin, cona gabdais
fir catha fria n-athair.
Lodar iarsin o Chruachain tar Ath luain arfud Midi tar Ath
Féne, dar Findglais, dar Glais Tarsna, dar Glais Cruind, dar
Druim n-Airthir.
Tri tricha ced andsin im Eochaid. Timnais dono Eochaid
troscad ara macaib im thelcaid doib nó im chairdi mís dó fr
p. 149.
cath, & ni thucad do acht cath arnamárach, & ros-mallaig Eochaid
andsin iad, & adbert: ‘Beidid mar tad a n-anmann’,
& dobert in cath, & dochomairt .uii. mile [do shuidib], & romadmaid
in meic im theora nonbaraib leo .i. naenmur la
Nar doriacht tir ind Nair a n-Umall, conad ann dorochair ac
Leith na cor, & naenmor aile am Breas co Dun mBres (p. 502b)
co Loch n-Oirbsen, co ndorchair ann, & nonbar aile la Lothar
dar Ath luain, co ndorchair and.
Co tancadar a tri cind co Druim criaich [ria n-aidchi], conad
and isbert Eochaid in mbreithir, nach ngebed mac andiaid
a athar flaithius Temra can nech eturru on dail sin anuas.
Unde Druim criaich dicitur.
p. 150.
141. TUAG INBIR OCUS LOCH N-ECHACH.
(p. 503a)
Tuag Inbir & Loch nEchach, canas rohainmnigthea?
Ni ansa. Tuag ingen Chonaill Chollamrach, dalta Chonairi
p. 151.
móir meic Etarsceil, is and roalt, i Temraig, co slogaib mora
d’ingenaib rig Hérind uimpi dia himchoimed. O hindi (?) immorro
co cend a .u. mbliadan ni ro leiced fer ind dia himchasain
co ngabad ri Herenn a himchomarc. Rodfai[d] dono Manannan,
drai do Thuathaib de Danann, a richt mnai dia
cainteglach boden, co mbai teora aidche ann.
Isin cheathromad aidche immorro .i. aidchi luain, rochachain
in drai bricht suain osin n-ingin, conas-fargaib fair co hInbear
nGlais, ar ba head a cedainm. Conas-fuirim ar lar ’na
suan conigsed d’iarraid curaig, & nírb’ail do a duscud conas-bearad
’na suan i Tir Ban thshuthain, co tanic tond tuili dia eis,
coro baidead in ingen. Unde Tuag Inbir.
Doluid dono Fer Fidail mac Eogabail [roime] dia thig, &
rus-marb and Manandan ar son a mignima.
Loch n-Echach immorro, is sund adfédar .i. Eochaid mac
Maireada, brathair sen & Rib, co rongradaig ben a athar .i.
Eiblind ingen Guairi — is uaithi ainmnigther Sliab n-Eiblindi.
Lodar rompo for imirgi a hIrluachair co Brega & co Brug
meic in Og. IS and bae Aengus foracind, & dlomais friu, &
marbais a mbuar in aidchi sin & a n-echu arnamarach, &
romaed marbad na muintiri in treas aidche (p. 503b) mina
deachdais uad, & con-aitcheadar iarum imarchor a n-elba
uad, & dorad doib each, & adbeart a athchur dia tig siu sreblad
a fual. Mus-luat for cai mis medon fhogamair feascur
luain i Liathmuine. Annsin deillich a n-ech leu iar cur a
n-elba de, & silis a fual co mbo tibra a talmain. Dognithir
tech im suidiu, & gabais Eochaid flaithis n-Ulad co mbai
nai mbliadna dec i n-Emain.
p. 152.
IS ann luid Lind-mune tar Liathmuine, cor’ baidead Eochaid
& a cland uile acht mad Dairiu & Conaing, conad o Chonaing
Dal Selle & Dal mBuain. Cet bliadan iar nge[i]n Crist
ann sin. [Unde Loch n-Echach dicitur].
p. 153.
142. BENN BÓGUINE.
(p. 504b)
Beand Bogaine, canas rohainmniged?
Ni ansa. Bo do buaibh Flidaisi ingine Gairb meic Greascaid
mna Aililla Feasfonnaid adrulla and coro thai da laeg .i.
laeg fireann & laeg boineand, & fiadaigis dono sil na bo sin
ann co nad feta ni dib, cor’bad lana na muigi dib. Intan dono
no gesed in tarb bai ocaib no thiagdais ba in tire comfhoco[i]s
ina ndochum, & ni thictis iarum. Banbriugiu bai andsin .i.
Echdar ingen Uatha sin, bean sin Bruachda meic Baisgil. Bai
[for] altrom dono la side .i. Fiacha mac Neill. Doluid dono
p. 154.
in bo boi ’na beola sin fo ge[i]m in tairb ucud. Dlomais dono a
buime Fiachaig & adbert nad ebelta le he for a lacht co tisad
leis in bo ro thom[l]acht ina beolu no coro bebsad in [m]buar
n-angbaid. Doluid Fiacha riam co ro slecht in buar uile, co
n-ebert: ‘Is bo-guine andso & bid [sed] ainm na benni [se]’.
Unde dicitur Beann Bogaine.
143. SLIAB BETHA.
(p. 505a)
Sliab Beatha, canas rohainmniged?
Ni ansa. Bith mac Nae dono doriacht la Ceasair ingin Beatha
p. 155.
meic Nae ceathracha trath ria ndilind dochum nErind ar
imgabail [na dilend], ut dicitur in Capturis Hiberniae. IS ead
dono luid Bith rena shecht mnaib dec iar cedroind a .xx.u. immorro
iar mbas Ladraind, conid andsin rongab crithgalar,
con-apad de, cona ro adnaicsead na mna i carn [mor] Slebi Betha.
Unde Sliab Betha dicitur.
144. ÁTH NGABLA OCUS URARD.
Ath nGabla & Urard, canas roainmniged?
Ni ansa. Ceithri haraid badar la hOrrlam mac [n]Aililla &
p. 156.
Meadba. Dolodar aniar iar Tain bo Cuailngi. It e annso a n-anmand
.i. Fráech & Foichnem & Err & Indell, ceithri meic
Uraird meic Ainchindead meic Fir da Roth. Rodus-marb Cuchulaind
oc Ath Greancha, co tuc gobal ceithri mbeann fo a
cinnu uasan ath. Unde Ath nGabla nominatur.
Dia dard [Feargus] in fecht for[d]dail for slogu Erenn oc
Duma nGranarda aniar for Grellaich Sruthra [.i.] Sruthar
Chuillindi & Sruthar Gartchon, intan tangadar .iiii. meic
Uraird aníar for Tebthae (MS p. 505b) ndescert, is and doluid
Urard la Brig-le[i]th aniar, co faca dendgor na sliged do chairpthib
a mac & dodruimen com[b]ad [iar] maidm for firu Olnegmacht
& com[b]ad iar mbas Aililla & Meadba & a cheithri
mac, coro dianaigh a eocho .i. Cnamrad & Cruan a n-anmann
— coro daised & coro dergenset a aided i Fan Chruain.
Unde Urard & Ath nGabla & Tulach Cnamraid & Gleand
Cruain no[min]a[n]tur.
p. 157.
145. COIRE MBRECCÁIN.
Coiri mBrecain, canas rohainmniged?
Ni ansa. Saebchuithi mor fil itir Erinn & Albain hil-leith
p. 158.
fothuaid .i. comrac na n-ilmuiri aniar & aniar, an[d]eas & a
tuaid, co cuir cach dib im thuaim araile, co tuitid sis a fudomain,
co mbai amail choire n-obelda doleic in loim sis
suas, co cluinter a escal amail thoraind dochein. Conaid ann
dorala Breacan mac Parthalo[i]n doluid co fuaill & imtholtain
o[a] athair a hErind, coro[m]baid a coecait curach.
IS and dono [do]rala Brecan mac Maine meic Neill .l. curach
oc coimchennuch, coro baid[ed] ann, & ni therno dib
acht a scela [o orgain], & rl.
IS and [didiu] dorala Colam cilli iar ce[i]n, dia rochoimerich
in muir fris, dia [tua]rgaib cnama Br[e]acain meic Maine
meic Neill, dia n-ebairt Colam cilli ‘Condolb sin, a sein-Breacain’,
&rl.
p. 159.
146. BENN FOIBNI.
(p. 506b)
Beand Foibne, canas rohainmniged?
Ni ansa. Foibne mac Tairchealtain, deogbaire Echach Ailtleathain
meic Aililla Caisfhiaclaig, is e robuail Illand mac Earclain
meic Doithre, ri Slebe Mu[g]dorn, os gualaind Echach
Ailtleathain i n-ailt Midchuarta i Temraig Breg. Doluid riam
fothuaid [i]arfud mBreg. Mus-leic Feargna Fear gai leathain
inadiaid, & imusracht riam as cach be[i]nd [in-aroile] cusin
mbe[i]nn n-ucud. Conid ann rod-mert. Unde Benn Foibni dicitur.
p. 160.
147. MAG LÉIGE.
(p. 523a)
Mag Leigi, canas ra hainmniged?
Ni ansa. Liag ingen Trescadail meic Buain meic Bealaig do
Fhomorchaib (p. 523b) .i. siur do Morc mac Deileadh. Ba hi
dobid ag túr & ag tomus chana for clannaib Neimeadh o Morc
mac Deilead & o Conaing mac Faebair. Is amlaid dono dobidh,
& cingid [nó] liach iaraind lé & tri .l. a lan na leigi sin o
cach teallach a nErinn do chlannaib Nemid [.i.] cóica lán eatha
& lachta, .l. dono do min glain & .l. lan imme.
Fograid dono clanda Nemidh cath for Morc & for Conaing.
An tan tangadar síl Nemid siár do chur chatha imrecaib &
Liach ar Muig Leigi, & cis airthir Erenn lé ’cá idnacul do Thur
Conaing, co rus-marb Britár mac Fergusa Leit[h]deirg, & ra
adaig clanda Nemid imo hainm do beith forsin ferand indro
marbad. Unde Mag Léige dicitur.
p. 161.
148. SÉIG MOSSAD.
Seg Mosad, canas rahainmniged?
Ni ansa. Mosadh (p. 524a) mac Main meic Iáir meic [Fh]leisci
findi co fuair seig a Fidh Eoin, & ro biath co forbairt iarum
co n-ithead na graigi & na tainti & na daine [dessaib & triaraib].
p. 162.
O na fuair a daithin dofheall ara oidi co n[d]uaid isin
muigh. Unde Seg Mosad dicitur.
Mossad mac Main grindi gel
mac Fleisci findi, fo an fer,
ailis ség fri seal subaigh,
robo mer don mórchuraidh.
149. BREFNE &rl.
Breifne, canas rohainmniged?
Ni ansa. Brefne an bangaisgeadhach .i. ingen Beoáin meic
Beothaig meic Iarmuineil fatha mac Nemid, rodoscomraig and
& Ragan Anglonnach do clannaib Caim .i. taiseach teglaig
Aengusa meic inn Oig, co ndrochair leis in ingen. Unde
Breifne dicitur.
p. 163.
Luid dono Ragan co hAill meic Asuaill, cor’ marbad and la
Tuaith Dé Danann. Unde Tuaim Ragain dicitur.
Mag Innusa .i. o Innus ingin Breis meic Ealathan ainmnigther.
Sliab Fraech .i. Fraech do muindtir Ceasrach adbath and,
dia mbadar andiaid Fhinntain. Dochuirsed cloch cach mna fuirri
isin tsliab. Unde Sliab Fraech dicitur.
Mag Slecht .i. is ann doshlechtsad fir Erenn do Crom Chruach
im Thigernmas mac Follaich, co ndorchair deich cét & tri míli
dib. Unde Mag Slecht, & Mag Senaig a ainm artus.
Unde Breifne dicitur. Findtan doroine:
Brefne ca hadbar día fhuil, &rl.
p. 164.
150. LOCH LAIGLINNI.
(p. 524b)
Loch Laiglindi, canas rohainmniged?
Ni ansa. Laiglindi mac Parrthaloin & Dealbnad ingen Lochtaigh
a máthair. Tainig Laiglinne .l. laech co Tipraid Dera
meic Sceara. Ramebaidh tond tairrsib, cor’ baid Laiglinne cona
.l. laech, co nderna[d] loch de. Unde Loch Laiglindi dicitur; &
adbath Dealbnad immorro a máthair, bean Parrthaloin, dia cumaid
cona .l. ingen.
151. LOCH CENN.
Loch Ceand, canas rohainmniged?
Ni ansa. Cath doradad araili lá [la] Colman Mór mac Diarmada
p. 165.
& la Cairpri mac Each[ach] meic Aengusa meic Nadfraeich,
co ndorchair Colman and iar maidm chatha fair, co
tucadh isin Loch Cend, & nái cét cenn do chennaib a sluaig
mailli fris. Unde Loch Cenn dicitur, & Loch Silenn roimi sin é.
152. MAG NDUMACH.
Mag nDumach, canas rohainmniged?
Ni ansa. Cath doradadh etir Eber & Eremon ann, dá mac
Miled, um na tri dromandaib as deach bai a nErinn .i. Druim
Cresach & Druim Beitheach a cuid Erimoin [& Druim Fingin a
cuit Ebir]. Ba bec lé hEber aen druim ’sin leith tes & a dó ’sin
tir thuaid, & adbert Erimon na fuigthea uad a chuid. Ferthair
cath eatorru. Ra meabaid tra for Eiber, co ndorchair and
Eiber & Palap mac Erimoin lá Conmael mac Eibir, & dogníead
dumada ar an laechraid annsin. Unde Mag nDumach, & Mag
n[D]enusa a ainm ar tus.
(p. 525a)
’San chath for Denus na dreab,
’san muigh adrochair Eber,
a torcradar amalle
Goisten, Segda ocus Suirge.
Unde Mag n[D]umach dicitur.
p. 166.
153. CNUCHA.
Cnucha, canas ra hainmniged?
Ni ansa. Cnucha ingen Conaing a hiath Luimnigh, buime
Chuind Chétchathaig, dochoidh and do tham ina tigh feisin, &
do hadnaiceadh lá Conaing isin chnuc ugad .i. Cnucha. Unde
Cnucha dicitur.
Finit. Amen. Finit.
© 2008 Thesaurus Linguae Hibernicae