Scéal eile ar Rón

Do bheir rón ar an bait a bhí agamsa ag iascach tráthnóna agus bhíos lán-deimhnitheach gur pollóg a bhí ’gam. D’éirigh sé ar mé a tharrach agus dh’éirighíos-sa ar eisean a tharrach ach bhí sé róláidir dom in aisce. Bhí sé ag déanamh isteach ar dhallóg na róinte liom agus mise a’ tarrach amach ar mo dhícheall ach níorbh aon chabhair dom é, bhíos á bhreith leis aige go tapaidh.

Thugamar ana-thamall ag gabháilt dá chéile agus ní raibh ’fhios agam cad a bhí ’gam go dtí sa deireadh d’éirigh sé os cionn an uisce, sin é an uair a aithníos mo rón. Sin é an uair a scanraíos mar cheapas go mbéarfadh sé isteach mé. Bhí gadhairín sa bhád in éineacht liom, gadhairín beag dubh go raibh Paddy mar ainm air. Do chaitheas amach an gadhairín h-ent a mbéarfadh sé air ach níor dhein. B’é toil Dé gur bhris sé an drae [dorú] agus é ag déanamh isteach ar an ndallóg liom. Sin a raibh á bharr ’gam luach ceithre scillinge drae agus luach scillinge de bhait a bheith curtha bun os cionn liom aige, ach ba chuma dhom ón uair ná rabhas féin aige.