Furcht und Ekel vor dem Tode

Author: unknown

p. 216.

(MS p. 47)

Corbmac [mac Cuilennain] cecinit.

1. Is imdha eccla ar mh’anmain, timna eccnai rom-fognaim:
m’eccla co ria sech demnaib ar nemhdaibh co Dia in domhnaigh.

2. Eccla piasta na croine, eccla diabuil co nduire,
eccla ecca ocus uaige, eccla uaire na huire.

3. Eccla ifirn duibh demhnaig ’na minic fóidh guil gallraigh,
eccla sloigh díabuil dobraig do-forlaigh ar gach anmain.

4. Eccla shústa duirn diabuil cona c[h]eithirn guirm ghlóraigh,
eccla croinn áis an áraidh, eccla gábaidh báis brónaigh.

5. Mo thaebh, a Dé fodera, bidh cáel, bidh cré, bidh crumhæ,
cech taebh dom thaobaibh gelaib bid tana ó daolaibh dubæ.

6. Mo chorp cáel cúal do chnámaib, ced trúag cech táeb dom tháebaib,
ní bec lem é co hécaid d’enaib Dé no da dáelaib.

7. Mo chorp trúag nach tréic tenid, nach léic úad a olc bunaid,
brénfad biaid ina blagaib, ragaid ar criaid ’s ar crumaib.

8. Ro-herc m’úald m’olc fadera, ro-tregd mo chorp truag tana,
doní mo deora duba cruma ar tí m’fheola is m’fhola.

9. Ní huaim téit éc dían deimin, acht triall for sét dom shaigid,
rom-icfa lá, a Dé in doluid, atá ar conair e im aigid, & c.