The March Roll of the Men of Leinster

Author: unknown

p. 121.

(MS fol. 48b)

1. Dia ngaba apgitir Lagen, bad leir nosaisneidfe doib:
nertaiget fri flatha foited, certaiget in coiced cóir.

2. Athiget a n-armu deimni co mbat seirgi fri cach reim,
do chathroe fri Connacht cubaid, fri Mumain, fri sil nar Neill.

3. Mad hi Desmumu dosroö otha Tuind Clidna co Cliu,
is la hUib Ceinselaich cetaig cruadc[h]ongbail a n-etain friu.

4. Mad hí Tuathmumo dosfera, ni ferr teit in dam na thicc,
fri hOssairgi sin co fessaid co frosaidbli Bresail Bricc.

5. Mad hiat Connachta dosfera, ni dlegat a ndola i mbiu,
Læches, Commaind, Failgi, Bairchi, at he regdai a n-airbri friu.

p. 122.

6. In tan atagamar anrecht o chlaind chruthglain Colmain Moir,
atraig Bretach Maighe Liphi condas-cichi sroin fri sroin.

7. Clanna Conaill ocus Eogain a hAiliuch Neit, nisgeib ceas,
fortuatha Laigen Fir Chualann congbat ag ruadarm fria cnes.

8. Nocho beo fri foimtein Ulad a hollchuiciud Branduib bil,
ní thargat do thrut frim choimniu cein bes in Coimdiu for nim

9. Ni thabraim eisleis na ngeinti dar glas[sa] in mara moir,
dia tisat co hat[h] no hairer, teit cach ar a chlaideb doib.

10. Dianostora forlunn echtrann, comrainnet a sluag hi tri,
a trian im chlaind Condlai cochthaich, riam nirbat opthaich im ni.

11. A da trian im chlannaib Luigdech, o Gabran sair segta a sluaig,
ma contoiet fri fir flatha, cloiet na catha co cruaid.

12. Cengat cen chomfoirbb don chatroi, comeirget huili don gleo,
do chosnam in choicid chathaig. forfhacaib a n-athair leo.

13. Dia ngaba aipgitir Lagen huas iath Banba, breo do rath,
ni biat cen chath no cen triamna o chind na secht mbliadna immach.

14. Lagin o Étur co hInneoin, co Femen fuind na da dam,
cosin coirthe fil i nhUisniuch, ni coibche tuislid rosgab.

Dian.