Crechán und Cíanóg

Author: unknown

Editor: Kuno Meyer

An electronic edition

p. 307.

(MS fol. 24a)

Brugaid cetach comrumach boi isin leith iartharaig do
Chonnachtaib darsat (sic) comainm Crechan Ciantestach mac
Angaile & isi ba banceile don brugaid sin .i. Cianog. Ingen Í
Cicharain .i. aircinnech Etargabla a crich Lughna an Cianog sin
& ni bai ni a n-easbaidh acht a mbeith can gein meic no ingeine.
Ocus roaitc[h]etar næma & erluma ac troscad & ic iaraid.
cloinne do cait[h]im a comorbaise & ni fhuairutar a n-inat da
næmdacht an athcuindce. Condubratar aroile oidc[h]e ina
n-imdaigh & ina n-ardlebaidh: ‘As olc immorro’ for siat ‘cen
mac no ingin acuind & imad mait[h]esa linn’ . (f. 24b) Condebairt
Creachan re Cianoig: ‘Ata senoir craibdech a faidhc[h]e
Sogain Salbuidhi .i. i Cluain Caraill .i. Cairell Sen mac
Curnain meic Trena meic Finnc[h]ada meic Nair meic Erca meic
Tipraiti meic Soghain Salbuidi meic Fiachrach Araidi & is e in
Cairill sin indara Padraig in c[h]uigid sin. Ūair gach inad inar
deimin le Padraig bendachad do C[h]airill, nirbennaigh fein
ann & eirc-siu dó & troisg aige ocus dogeba h’icee uada.’

p. 308.

Acus tanic Cianog co Cluain Cairill & rotroisg fo t[h]ri re
Cairill isin cathraigh & rotroisg Cairell lin a teglaigh do
cumnam le Cianoig .i. secht næm ar dec & secht cet naem, rob
iat sin tra muinter Cairill do bunad, ocus tainic Cairell co Cianoig
d’innisin a uirigill o Bictar aingel tar eis a treidenais.

‘Docuamair-ni tra’ for Cairell .i. derbch- ar in duilema[i]n
& ic a cantain fria Cianoig secht naim dec & secht cet do iaraid
toirc[h]esa do thecmail duit & ni fuaramar uile a beith ’na mac
& o nach fuaramar tra ita nem can athc[h]eod dot anmain. Ocus
imthig do[t] tig & teicemaid toirc[h]es duit ocus bera da ingen
.i. ingen i tosaigh oi[d]chi & tabair Osnadh d’ainm uirri. Ocus
faifidh in Osnaid sin re Erchad mac Murchada & beraid sin
ingin .i. Bebinn ingen Erchaid, conid iside berus Brian Boruma
mac Cinnedig & secht meic coscracha Cinnedig arcena. Ocus
faifidh ina diaig sin la rig mBoirne Mæl[sh]echlainn mac Arga,
conad i berus da mac maithi do .i. Lochlann & Concubur o
mbiat Hui Lochlainn & Hui Conchubuair na crich sin. Ocus an
ingen bert[h]ar deradh oidhche, tabair Creisi fuirri & faifidh in
Cresin la Tadg na tri tor & beraid tri maccu dó .i. Concubur &
Mælruanaid & Muredach.’ Ocus tosach a baile an aidc[h]e sin
ar n-imtecht do Cianoig da cathraig, conid ed asbert:

Sil Bebinn for Boirinn bain. sil Cresi a Cruachain comlain
gach æn dib da ragha rim. ni bia i rigi co foiltfinn.

Close this window