Saint Moling et le Lépreux
Author: unknown
Editor: Paul Grosjean S.J.
An electronic edition
view the header | view the translation | view MS A9 on ISOS
p. 286.
(MS p. 30a)
Feacht do Moling oc imtecht a seta co nfhaca an clam ndochraidh
ndodealbdha ara cind. ‘Can tici, a cleirigh?’ ol in
clam. ‘Ticim asan coilli,’ ol in cleirech. ‘Beir misi lat
p. 287.
don eclais ar Dia.’ ‘Is maith lim,’ ol Moling; ‘tairr as
didiu,’ ol se. ‘Cindus on?’ ol in clam. ‘Amhail tangais
conuigiso,’ ol Moling. ‘Nocha fedim imtecht,’ ol se,
‘conad fhadur m’imcur co shocur.’ ‘Tairr ar mo muin,’
ol Moling. ‘Ni rach,’ ol se, ‘cona raibi ni dot edach atrum
& tu, ar ni fuicfed in tedach ni dom lethar orum.’ & cuiris
Moling a edach dé iarsin, & tocbaidh an clam fora muin. ‘Seid
mo shron,’ ol se. Atnaigh iarum Moling a lam cuigi dia seidedh.
‘Ach,’ ol in clam, ‘oir benfaid do mera mo lethur
dim. Tabair do bél impi.’ Dobeir an cleirech a bel impi,
& suighis cuigi hi, & cuiris ’na dorn cle in seile. An silladh
ro fech secha, ni fhider i nim no a talmhain dodechaid in
clam. ‘Coir iarum eisin,’ ol Moling, ‘mas do[m] melladh
tainic mo Thigerna. Ni coitelsa & ni caithiub biadh co
tora mo Thigerna co follus.’ Robi iarum isin (p. 30b) n-inad sin co medhon
oidhche, & tainic aingil cuigi, & asbert fris: ‘Cinnus budh
ferr lat do Thigerna do tuidhecht dod tacallaim?’
‘A richt
meic secht mbliadhan,’ ol se, ‘co ndernuinn ille buidhi ime.’
Ni ro rathaig sium a cin[n] ree iarsin co ro suighister Crist
ina ucht a richt macaim secht [m]bliadhan, co trath eirghi do
lo arnamairach. Conadh ann asbert an taingel: ‘Mas lat, eirigh
don neclais.’ & teid Moling don eclais iarsin, & sgribtar an line
sin aco. &rl.
© 2006 Thesaurus Linguae Hibernicae