Coirpre Crom and S. Ciaran
Author: unknown
Editor: Whitley Stokes
An electronic edition
view the header | view the translation
p. 368.
(MS fol. 78a)
Coirpre Crom mac Feradhaig mic Lugdach mic Dállain mic
Bresail mic Maine Móir, a quo Húi Maine Connacht. Dognith
in Coirpre sin ulca imda fri cách. Dorala dosomh a haithle
dibercce dol co Doire cremhae hi crích Ua Maine co ro codail
p. 370.
ann. Tanccus cucco-somh annsin, co ro marbadh, & ruccadh
a cend co tochar Cluana boirend for bru Sionda. Facabar forsan
nglaslicc cloiche fil i medhon in tochair in cend.
Ciaran mac in tsóir antan sin hi cCluain mic Nois. Gar
becc riasin trath sin doróine Coirpre a fháisittin fri Ciaran, co
tucc a coibhsina huile dó. O’tcualaidh Cíaran a marbhadh
somh, docoidh co Turloch ndroma. Tuccadh an corp ina
dhocom, ocus ro benait cluicc oc na cleircibh immon corp,
conidh Ard na ccloc fil forsin maighin-sin beos.
Tangatar iarsin co hairm i mbói in cenn. Boi demon i
ccomhaitecht an chind an tan-sin.
‘Cidh dogni annsin, a troigh?’ ol Ciáran frisin demon.
‘Manach diles damh bodéin,’ ol demhan, ‘intí isa cend so.
IS aire atú ina coimhittecht.’
‘Ac tra,’ ol Cíarán, ‘ní fír sin: (f. 78b) fer faisitte ocus aithrighe
damhsa & do Día hé,’ ol se.
Benar uadh in cend iarsin ocus faccabar demon a áenar
forsan licc, conidh desin nach maith saltradh forsan
licc sin forsa frith an cend, ar ní déne a less anti shaltras an la
dogni.
Berar in corp ocus in cend co Cluain maic Nóis iarsin co
tucadh in cend frisan meidhe. Tuccadh iarsin adhart Cíarain
fon cend, co ro len an cend don colainn tre breithir Ciarain,
co ro athbeoaiged Coirpre o mharbhaibh. Ba crom a muinel o
sin amach, conidh de ro glen Coirpre Crom de.
Ro gabh Coirpre righe Húa Maine iarsin. Doratt Cúil fota hi
fot fri haltoir & na hImlecha i screpall a thodhuisci do Día
ocus do Chiarán. Ocus dorat a mallachtain don ti dia clainn
doberadh a mhancine o Chiaran co brath. Ocus atbert fos co
scertai rige ocus airechus frissin ti ro roissedh a manchine fair.
p. 372.
Fiarfaighis tra Cíarán de an ruccadh dochum nimhe no ifirn
he. ‘Niam-ruccadh,’ ol se, ‘ar ni berar anim dochum nimhe co
n-adhnaicter an corp. Ocus ni berar ainim dochum nimhe na
iffirn co cend secht trath leis. Ro bátar tra demuin & aingliu
(sic) oc imcosnamh ma anmu (sic) o do scarsat frim corp hí.
Ba treissi, tra,’ ol se, ‘don faisittin ocus don aithrighe ocus
don iarmhéirge inás dona holcaibh ro airmittis deamuin form.’
Conidh maircc bís de sin cen a fhaisittin dogres.
FINIS.
© 2008 Thesaurus Linguae Hibernicae