A Poem on Aed mac Domnaill úa Néill of Ailech

Author: unknown

p. 304.

(MS p. 72a)

1. Aed Ailig, inmain lim hé, dursan, a Dé, oided dó!
secht mbliadnæ oc Aed Átha Hí robud sía mí ag Máel na mBó.

2. Secht mbliadna dam-sa ag rígh Rois, robud cóem m’am-sa ag Máelmis,
cid mís nobheinn ’gun ríg thess, rofess ná bíad mo scís fris.

3. Mór míad dorad dam-sa in rí, dom ríar dorad fiadha faoi,
maith graig dorat damh rem lá romhac na mná ó Maigh Áoi.

4. Dursan, a Chomghaill na cceól, mac Domnaill do dheól don dáol,
dursan a oinech re lár, dursan Ailech án gen Áod!

5. Ón ló romarbadh Áed oll becc d’fheraib talman nach gann,
ó’tbath aithghein Logha lóir frossa fola bud cóir ann.

6. Atá Temhair gan a túar, atá fo gredhaibh a gáel,
atá in gæ gréine arna crádh, atá Éire án cen Áedh.

7. Ní thaitnenn soinenn fri slíabh, ní caiter mess crobang ccáemh,
cech adhaig as dorcha a dlúimh ó doradadh úir tar Áedh.

p. 305.

8. A muinter Ardmacha móir, ’ga tá mac na flatha fáen,
ticfaid dáil toibéime úaid, bar n-úaigh obéle ré nÁedh.

9. I cath Craoibhe Tolcha thúaid rofágbhus m’áes cumtha caomh,
maircc a haithle in fhleachaid láin dosgáin Eachaid ocus Aedh.

Aedh.